BOBONARO, 14 Maiu 2025 (TATOLI)—Administradór postu administrativu Balibo, munisípiu Bobonaru, Casemiro dos Santos, hateten iha tempu badak hahú ona halo reablitasaun ba fatin ka edifisíu Radiu Komunidade (RAKOM) foun ho naran Fronteira Balibo, tanba Sekretáriu Estádu Komunikasaun Sosiál (SEKOMS) apoia ona orsamentu ho montante $8,300.
“SEKOMS aprova tiha ona orsamentu, agora ami foti tiha ona. Tuir loloos ne’e badaen sira hahú ona servisu, maibé tanba horibainrua ho horisehik ita hetan vizita husi Prezidente Tribunál Internasionál Maritima, entaun la konsege. Maibé, iha tempu badak badaen sira halo reabilitasaun ba uma ne’e. Se reablitasaun ne’e mak lais, ami-nia alvu ne’e bele implementa iha Jullu kai ha Agostu nia klaran, tanba sasán sira iha hotu ona. Hein reabilitasaun ramata, tékniku SEKOMS nian sira-ne’e hein monta de’it ona ekipamentu,” Nia imforma ba Agência Tatoli iha Salaun Maria-Tapo, kuarta ne’e
Tuir nia, Rekursu Umanu atu operasionaliza rádiu ne’e preparadu ona tanba foinsa’e na’in-12 mak hetan ona formasaun lpma-ba jprna;izmu nian ho apoiu husi tékniku sira husi Sekretáriu Estadu Komunikasaun Sosiál (SEKOMS).
Posiblidade establesimentu Radiu Komunidade ho naran “Fronteira Balibo” ne’e sei funsiona hanesan plataforma komunikasaun sosiál ida iha Timor-Leste, iha fulan-Jullu tinan 2025 ne’e.
“Iha primeira faze ne’e sei hatama uluk joven na’inhitu (7) ka ualu (8), nune’e bele funsiona rádiu ne’e, depois sei halo lansamentu iha ambitu komemorasaun loron liberdade imprnesa iha 16 Outubru tinan ne’e,” nia dehan.
Líder másimu iha autoridade postu administrativu Balibó ne’e hato’o agradesimentu no konsidera estabelesimentu Radiu Komunidade foun ne’e bele transmite no hamoris lian komunidade iha fronteira liuliu sira ne’ebé iha área rurál la asesu liña internet.
Casemiro, haklaken Frekuensia Rádiu ne’e alende kobre suku hitu iha Balibó,sei kobre mós Munisípiu Bobonaru inklui área viziñu sira-ne’ebé pertense iha Atambua, Kabupaten Bellu, propinsi Nusa Tengara Timur (NTT)-Indonézia.
“Ami sente ne’e benifisiu ba komunidade Balibo. Rádiu ne’e atu fó-sai informasaun liuliu ba produtu lokál komunidade nian iha baze no mós kultura, desportu no fatin poténsiá turizmu nian, hodi pasa informasaun ba munisípiu no nasionál atu rona. Ita la presiza pasa ona informasaun husi ibun ba ibun maibé husi rádiu ne’e hotu-hotu bele asesu,” nia hateten,
Enkuantu, antes ne’e Sekretáriu Estádu Komunikasaun Sosiál, Expedito Dias Ximenes, hateten “Rádiu Komunidade Fronteira Balibo”, lokaliza iha munisípiu Bobonaro, establese hodi hanoin hikas trajedia ne’ebé hamate jornalista na’in-lima (5) hanesan Greg Shackleton (29), Tony Stewart (21), Gary Cunningham (27), Operadór kámara Brian Peters (24) no Repórter Malcolm Rennie (29) ne’ebé koñesidu ho naran “Balibo Five”.
Ezisténsia Rádiu Komunidade “Fronteira Balibo”, tanba Balibo nu’udar fatin istóriku liuliu jornalista na’in-lima (5) neʼebé fó sira-nia aan mate tanba buka informasaun.
Enkuantu postu administrativu Balibó iha aldeia hamutuk 27, suku hamutuk neen (6) ho totál populasaun hamutuk 19,869 no uma kain 4,708.
Jornalista : Sergio da Cruz
Editór : Cancio Ximenes
Fonte Notísia : https://tatoli.tl/2025/05/14/edifisiu-radiu-komunidade-fronteira-balibo-sei-reablita-iha-tempu-badak/
Leave a Reply